Асхат Тағыберген команданың халықаралық аренаға қайта оралғанына риза екенін және өзін толық дайын сезінетінін атап өтті.

- Біз Паневежиске келдік. Ертеңгі еурокубок ойынына дайындық жақсы өтіп жатыр, халықаралық аренада қайта ойнайтынымызға қуаныштымыз. «Тобылда» еурокубоктарда бір жылдық үзіліс болды, сондықтан бұл ойынға байыппен дайындалып жатырмыз. Ертең жеңіске жетеміз деп үміттенеміз. Біз жүз пайыз дайынбыз, - деді капитан.

Тағыберген бөлек капитандық таңғыштың ол үшін нені білдіретінін және киім ауыстыратын бөлмедегі көшбасшының рөлі қандай екенін айтты.

- Капитан болу оңай емес. Адамгершілік қасиеттерге ие болып, команданы қолдай білу керек. Әр футболшының өз мінезі бар, сонымен санасу қажет. Әр ойыншыға жеке тәсіл табу, оны дұрыс баптау, күш пен сенім беру маңызды. Менің ойымша, капитандық таңғыш ең алдымен адамгершілік қасиеттермен байланысты, - деп атап өтті ол.

Капитан сондай-ақ команданың осы маусымдағы нәтижелерін және үнемі жоғары мақсат қоятын клубтың дәстүрлерін еске салды.

- Біз маусымды жақсы бастап, Суперкубокты жеңіп алдық. «Тобыл» әрдайым алдына үлкен міндеттер қояды. Бұл Қазақстан өлшемімен алғанда үлкен клуб, еурокубоктарда көп ойнаған. Мен өзім мұнда 2021 және 2022 жылдары ойнадым. 2021 жылы біз чемпион атандық, сондай-ақ клуб Суперкубокты үш рет жеңіп алған. Футболда күн сайын жеңу мүмкін емес, жеңістердің жанында әрдайым жеңілістер болады. Олар бізді адам, футболшы және спортшы ретінде күшейтеді. Қазір біз ойын ұйымдастыруын және тактиканы жақсарттық. Чемпионат матчтары - бір бөлек, ал еурокубок кездесулері - ерекше. Біз байыппен дайындалып, ертең күресеміз, - деп мәлімдеді Тағыберген.

«Паневежис» - «Тобыл» арасындағы алғашқы матч 23 шілдеде Паневежистегі «Аукштайтия» стадионында өтіп, Қазақстан уақытымен 20:30-да басталады. Қарымта кездесу 30 шілдеде Қостанайда өтеді.

Пікірлер (0)

Пікірлер (0)